Duuti akka jiru beekna. Duuti jiraatus qaalii hawwaasaa, ilma saafila sichi hawwaasa kana fuudhee bakka yaadaaf garaa isaan gaha jedhamee yaadamu dhabuun garuu dhuguma du’a.
Namni kamuu gaafa dhalate du’e kan jedhu hawwaasni keenya, ta’us garuu du’a laalaa hedduu qabdu, du’a harka namaan raawwatamuuf eenyumtuu gadduuf dhiphachuun waanuma jiru.
Hawwaasni Oromoo qaaliiwwan hedduu dhabeera. Biiftuuwwan akka aduu ifanii fi garboonfattootaaf abbootii irreen dhaaman hedduun kan isa mudate Oromoon, har’as qaaliiwwan ofii qabsichaaf dhabuu itti fufeera.
Battee Urgeessaa hawwaasa Oromoof Biirtuu dukkana ibsu, kan garbummaa onsu ture. Biiftuun Oromoon argate Batteen huurrii garboonfattootaa, duumessa abbootii irreen dhaamuun hangam akka hawwaasa garaa madeesse eenyumtuu itti walii gala. Battee Urgeessaa Biiftuu ifaa lixedha. Hawwaasa isaa garbummaan jiita’uuf sagalee ta’aa, garboonfataa falmaa, dhaadataa, sodaa malee qabsoo gaggeessaa daandii san irratti kufe. Akkuma Biiftuun ifaa lixu, Batteen osoo duuba hin jenne, osoo garaa hin hirre waan uumameef jiraataa godaane.
Huurriin Battee Urgeessaa nyaate kan yeroo, kan hundee hin qabnedha. Biiftuun akka Battee saba kanaaf ifa kennaa godaanaan hedduun kumaatamaan dhalataniiru. Batteen du’aan dhabameera. Dhugaa eenyu haaluu hin dandeenye garuu Battee Batteen leenjise,Battee Batteen guddise hedduun wal horee har’as qabsoo itti fufeera
Waa’ee Jaal Battee oggaa yaannu, oggaa dubbannu gootummaan maal akka fakkaatu hubanna. Miirri sun nu keessaa danfee bulluqee hanga Oromoon roorroo jalaa bahutti akka nurra jiraatus ulaa saaqa. Battee Urgeessaa warri ajjeese qaama yaadatti hin amanne, warra beekumsa yaadaan mormuu hin qabne ta’uu nama hubachiisa. Sabni Batteen ajjeefameef dhugaa isaa, haqa isaa barbaaduuf oggayyuu duuba akka hin jenne beekuun murteessaadha.
Akkuma nama kamii kichuuwwan daa’immankee gidduu jiraattee kunuunsaan guddisuun fedhii kee qofa osoo hin taanee kaayyoo keeti. Hangam daa’immankee akka jaallattus namootni sitti dhiyoo ragaadha.
Ta’us ati daa’immankee qofaaf osoo hin taane guutummaa sabakeef of laachuun, dararaaf miidhamni sabaa dhaabbachuu qaba ejjennoo jedhu qabattee adeemuun diina boqonnaa dhorke. Injmaa ejjennoo hin taafamne, kan daddaaqama hin qabne ejjennoo amansiisaa kaayyoof irbuu gootawwan qabsoo bilisummaa san qabattee cichuun hirriba isaan dhorkate.
Harka duwwaa meeshaa hidhannoo malee beekumsa uumamaan waaqnikee si badhaaseen humna Qawwee qabu taa’uuf ka’uu dhorkite. Isaan Qawween ala yaada siyaasa karaa nagaatti hin amamme san xiyyeffannaan akka si adamsan kan taasise beekumsaaf kutannookee qofa ture.
Inumaa murtiin hanga du’aatti sabaa dubbachuu, sabaa qabsaa’uu, haqa uummataa saaxiluu hin dhiisu jettee ati qabatte saffisaan akka tarkaanfii gara jabinaan guutame kana sirratti fudhataniif ulaa baneera.
Qaaliin akka Battee Urgeessaa kan gootummaa qabu, naatoo fi marartee saba isaaf qabu haala hamaaf gaddisiisaa akkanaan dhabamuun hangam akka nama eelchu nu warri haalaan si beeknu ragaadha.
Ati har’a lafa dhugaa jirta, biyyi kijibaan guutamte, isheen miskiinotaaf warra dhugaaf lafa dararaa taate sun akkuma sanatti hojii ishee jibbisiisaa itti fufteetti.
Biyya lafaa kanarratti namni kamuu waan uumamuuf qaba. Namni waan uumameef galmaan gahee darbu garuu muraasa. Kaan waan uumamaniif osoo hin jiraatin inumaa waan uumamaniif osoo hin barin addunyaa kanarraa godaanu.
Batteen isaan waan uumameef hojjetee, dubbatee sokkeera. Uummataa qabsaa’uu, sagalee saba ofiif ta’uun kaayyoo uumameef galmaan gahatee darbeera. Isaan Battee ajjeesan kaayyoo fi ergama isaa waan ajjeesan itti fakkaachuu danda’a. Garuu Battee tokko waggaa darbe yoo ajjeefames kan akkasaa kumaatamaan qabsicha itti fufsiisuutti jira.
Akka Oromootti Battee of biraa dhabuun qaawwaan yoomuu hin duudne, godaannisni yoomuu bakki isaa hin badne nu mudateera. Batteen maatii isaa qofaaf osoo hin taane haamileessaa sabaa ture. Dhiira gaafa xiiqii, kan bakka rakkoof rakkiftuutti saba isaa barbaadu. Iyyaafataa hidhamaa, barbaadaa hiraarfamtootaati. Batteen faanni isaa mana hidhaarraa fagaatee osoo hin beekin nu biraa ajjeefame. Miilli isaa wayiita mana hidhaa gahu namni haamilee hin horanne, kan abdii hin godhanne hin jiru.
Namni hawwaasa isaa rakkateef birmatu, kan hidhame gaafatu ofiif garuu fala ta’uu dadhabee haala gafaa namaa nyaatuun dirree irratti dhiigni lola’ee lubbuunsaa dabarte. Madaa bara baraa nuu ta’ee hafeera. Har’a waggaa tokkoffaa ajjeefamuu Battee oggaa yaadannu miira xiiqii fi miira gootummaa keessa taanee ta’uu qaba jechuun heda.
Injifannoo Ummata Oromoof
Olumaa Imaanaatiin
Eebla 11,2025
